(ភ្នំពេញ)៖ ករណីដ៏គួរឱ្យសង្វេគមួយបានកើតឡើងចំពោះបងប្រុសម្នាក់ដែលជាមន្ត្រីយោធា (ទាហាន) បន្ទាប់ពីរូបគាត់បានបង្ហោះវីដេអូទាំងទឹកភ្នែក រៀបរាប់ពីទុក្ខលំបាកវេទនាពាក់ព័ន្ធនឹងការទិញផ្ទះនៅបុរីមួយកន្លែង ដោយរំពឹងថានឹងមានផ្ទះជារបស់ខ្លួនឯង ប៉ុន្តែចុងក្រោយបានត្រឹមតែបំណុល និងការឈឺចាប់។
យោងតាមការរៀបរាប់ក្នុងវីដេអូ បងប្រុសបានឱ្យដឹងថា រូបគាត់បានសម្រេចចិត្តខ្ចីលុយពីធនាគារដើម្បីយកមកទិញផ្ទះនៅគម្រោងបុរីមួយ ដោយមានការសន្យាក្នុងកុងត្រាថា នឹងអាចចូលរស់នៅបានក្នុងរយៈពេល ១៨ខែ។ ក៏ប៉ុន្តែក្តីស្រមៃនោះបានរលាយបាត់ ខណៈដែលមកទល់នឹងពេលនេះ ការសាងសង់បានយឺតយ៉ាវលើសកុងត្រារហូតដល់ទៅ ៣ ទៅ ៤ឆ្នាំហើយ នៅតែមិនទាន់បានផ្ទះ។
អ្វីដែលធ្វើឱ្យជីវិតរបស់គាត់កាន់តែលំបាកនោះ គឺបញ្ហាហិរញ្ញវត្ថុ។ បងប្រុសបានរៀបរាប់ទាំងអួលដើមកថា ប្រាក់ខែទាហានដែលគាត់ខំបម្រើជាតិ ទទួលបានមកគឺត្រូវយកទៅបង់សងធនាគារស្ទើរតែទាំងស្រុង។ រូបគាត់ត្រូវបង្ខំចិត្តទៅជួលបន្ទប់ស្នាក់នៅក្នុងតម្លៃ ៥០ដុល្លារក្នុងមួយខែ ដើម្បីមានកន្លែងជ្រកកោនបណ្តោះអាសន្ន ទាំងដែលខ្លួនមានឈ្មោះជាអ្នកទិញផ្ទះបុរី។
ចំណុចដែលធ្វើឱ្យគាត់តូចចិត្តបំផុត រហូតដល់បង្ហោះវីដេអូនេះ គឺនៅពេលដែលមានការជួបចរចាដោះស្រាយរវាងអតិថិជន និងតំណាងបុរី ព្រមទាំងអ្នកសម្របសម្រួល។ ក្នុងពេលនោះ គាត់បានក្រោកឈរឡើងដើម្បីបញ្ចេញមតិ និងនិយាយពីទុក្ខលំបាករបស់ខ្លួន ប៉ុន្តែបែរជាត្រូវបានភាគីខាងនោះសម្លុត និងបញ្ជាឱ្យគាត់អង្គុយចុះវិញ ដោយមិនឱ្យនិយាយស្តីអ្វីឡើយ។
ទង្វើនេះ បានធ្វើឱ្យគាត់មានអារម្មណ៍ថាទទួលរងនូវការមើលងាយ និងគ្មានដំណោះស្រាយ ទើបសម្រេចចិត្តបង្ហោះសារជាវីដេអូដើម្បីស្វែងរកយុត្តិធម៌ និងការអាណិតអាសូរពីមហាជន ក៏ដូចជាសំណូមពរដល់ថ្នាក់ដឹកនាំ ឬស្ថាប័នពាក់ព័ន្ធ មេត្តាជួយអន្តរាគមន៍ចំពោះករណីរបស់គាត់និងអតិថិជនដទៃទៀតដែលកំពុងរងគ្រោះដូចគ្នានេះផង៕
សូមទស្សនាវីដេអូខាងក្រោមនេះ