(ខេត្តកណ្តាល)៖ កូនប្រុសបង្កើតម្នាក់ ត្រូវបានសមត្ថកិច្ចនគរបាលក្រុងតាខ្មៅធ្វើការឃាត់ខ្លួនភ្លាមៗ តាមពាក្យបណ្តឹងរបស់ស្ត្រីជាម្តាយ ក្រោយពីជនសង្ស័យរូបនេះបានផឹកស្រាស្រវឹងជោកជាំ ហើយបង្កហិង្សាដោយយកកន្ត្រៃចាក់ទៅលើឪពុកបង្កើតខ្លួនឯង បណ្តាលឱ្យរងរបួសធ្ងន់ ដោយសារតែខឹងឪពុកចូលទៅឃាត់មិនឱ្យឈ្លោះប្រកែកគ្នាជាមួយអ្នកជិតខាង។
ហេតុការណ៍ហិង្សាក្នុងគ្រួសារដ៏ហួសចិត្តនេះ បានកើតឡើងកាលពីវេលាម៉ោង ១៩ និង ៣០នាទី ថ្ងៃទី០៤ ខែមករា ឆ្នាំ២០២៦ នៅចំណុចផ្ទះជនរងគ្រោះ ស្ថិតក្នុងភូមិព្រែកហូរកើត១ សង្កាត់ព្រែកហូរ ក្រុងតាខ្មៅ ខេត្តកណ្តាល។
បើតាមរបាយការណ៍របស់សមត្ថកិច្ចបានឱ្យដឹងថា ជនរងគ្រោះត្រូវជាឪពុកបង្កើត មានឈ្មោះ អ៊ូ សុវណ្ណ អាយុ ៦៧ឆ្នាំ មុខរបរនៅផ្ទះ រងរបួសស្នាមត្រង់ក្បាលពោះ (មុតជ្រៅចំនួន ២កន្លែង), របួសផ្លូវខាងឆ្វេង និងត្រូវកូនដៃខាងស្តាំ ១កន្លែង។ ចំណែកឯជនសង្ស័យជាកូនបង្កើត មានឈ្មោះ អ៊ូ លឹមហុង អាយុ ៣២ឆ្នាំ មុខរបរនៅផ្ទះ មានស្នាមរបួសរយះត្រង់ចង្អុលដៃខាងស្តាំ ១កន្លែង។ ដើមបណ្តឹងត្រូវជាម្តាយបង្កើត និងជាប្រពន្ធជនរងគ្រោះ ឈ្មោះ ភឹម សែម។ អ្នកទាំងបី រស់នៅក្នុងផ្ទះកើតហេតុជាមួយគ្នា។
យោងតាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ ឪពុក (ជនរងគ្រោះ) បានឃើញកូនប្រុស (ជនសង្ស័យ) ឈរស្រែកជេរឈ្លោះជាមួយអ្នកជិតខាង ដោយដៃមានកាន់កន្ត្រៃដងជ័រពណ៌ខៀវមួយ។ ដោយឃើញកូនមានស្ថានភាពស្រវឹងខ្លាំង ឪពុកក៏បានដើរទៅឃាត់ និងអូសដៃកូនឱ្យចូលក្នុងផ្ទះវិញ។ ស្រាប់តែពេលនោះ ជនសង្ស័យដែលមានចិត្តអកតញ្ញូ បានយកកន្ត្រៃដែលកាន់នៅដៃ ចាក់ទៅលើឪពុកខ្លួនឯង បណ្តាលឱ្យមានស្នាមរបួសជាច្រើនកន្លែង។
ភ្លាមៗនោះ ដើម្បីការពារខ្លួន ជនរងគ្រោះជាឪពុកបានទាញកំណាត់ឈើជ្រុង វាយទៅលើកូនវិញត្រូវចំចង្អុលដៃខាងស្តាំ ១កន្លែង ទើបមានអ្នកជិតខាងរត់មកជួយចាប់បំបែក និងបាននាំយកជនរងគ្រោះទៅសង្គ្រោះនៅមន្ទីរពេទ្យ។
លុះដល់ព្រឹកថ្ងៃទី០៥ ខែមករា ឆ្នាំ២០២៦ ស្ត្រីជាម្តាយបានសម្រេចចិត្តទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលព្រែកហូរ ដើម្បីឱ្យសមត្ថកិច្ចឃាត់ខ្លួនកូនប្រុសបង្កើតយកទៅអនុវត្តតាមផ្លូវច្បាប់។
នៅចំពោះមុខសមត្ថកិច្ច ជនសង្ស័យឈ្មោះ អ៊ូ លឹមហុង បានឆ្លើយសារភាពថា រូបគេពិតជាបានប្រើអំពើហិង្សា និងយកកន្ត្រៃចាក់ឪពុកឱ្យរបួសពិតប្រាកដមែន។ វត្ថុតាងដែលដកហូតបានរួមមាន កន្ត្រៃដងជ័រពណ៌ខៀវ ១ និងកំណាត់ឈើជ្រុង ១។
បច្ចុប្បន្ន ជនសង្ស័យត្រូវបានឃាត់ខ្លួនជាបណ្តោះអាសន្ននៅអធិការដ្ឋាននគរបាលក្រុងតាខ្មៅ ដើម្បីកសាងសំណុំរឿងចាត់ការបន្តតាមនីតិវិធីច្បាប់៕