ភ្នំពេញ៖ ជនរងគ្រោះក្នុងហេតុការណ៍គ្រោះថ្នាក់ចរាចរណ៍ដែលបង្កឡើងដោយរថយន្តលោក ហ៊ុន ហេង កាលពីថ្ងៃទី១៥ ខែឧសភា ឆ្នាំ២០២៥ កន្លងទៅ នៅមុខក្រសួងវប្បធម៌ និងវិចិត្រសិល្បៈ នៅមិនទាន់ទទួលបានដំណោះស្រាយនៅឡើយទេ រហូតមកទល់ពេលនេះ។
ករណីគ្រោះថ្នាក់ចរាចរណ៍នេះ បង្កឡើងដោយរថយន្តម៉ាក LEXUS RX400H បានបុករះម៉ូតូកង់បីចំនួន ៣គ្រឿង ម៉ូតូ ១គ្រឿង និងរថយន្ត ១គ្រឿង។
បងប្អូនរបស់ជនរងគ្រោះខាងម៉ូតូ បានបង្ហោះសារដង្ហោយរកយុត្តិធម៌ថា៖ «មកដល់ពេលនេះរយៈពេល ៣ថ្ងៃហើយ ដែលបងប្រុសខ្ញុំ និងជនរងគ្រោះផ្សេងៗទៀត ពុំទាន់មានដំណោះស្រាយសម្រាប់ពួកគាត់នៅឡើយទេ ទាំងថ្លៃបន្ទប់ ទាំងថ្លៃព្យាបាលដែលគាត់សម្រាកព្យាបាលនៅមន្ទីរពេទ្យកាល់ម៉ែត្រ តើត្រូវឱ្យពួកគាត់រង់ចាំដល់ពេលណាទៀតទៅ ទាំងដែលពួកគាត់ស្ថិតនៅក្នុងស្ថានភាពតាមដានជំងឺរបស់លោកគ្រូពេទ្យនៅឡើយ»។
ក្នុងនាមជាប្អូនរបស់ជនរងគ្រោះម្នាក់ រូបគាត់បានសំណូមពរដល់ថ្នាក់ដឹកនាំគ្រប់លំដាប់ថ្នាក់ ជួយពន្លឿនដំណោះស្រាយមួយនេះផង ដើម្បីឱ្យជនរងគ្រោះទទួលបានការយកចិត្តទុកដាក់ និងការចំណាយលើការព្យាបាលសមរម្យ។
